लपाछ्पी

पाऊस असाच बरसणारा

अचानक तुझी आठवण देणारा ।

हृदयाचा एक ठोका चुकला तरी

बोचरी आठवण पुन्हा जागवणारा..

 विजा अचानक कडाडतात    

जणू भावना हुंकार भरतात ।

नसलेल्या अस्तित्वाशी सरी
पुन्हा नव्याने झिम्मा घालतात...

ओल्या पावसाचे तुषार जणू
तुझ्या श्वासाची आठवण देतात |
ओंजळीतील पावसाचे थेंब
पुन्हा क्षणांचे मोती होतात... 

मातीचा गंधही अगदी तसाच
मनाचा मोगरा ताजा करतो |
हृदयाशी  माझ्या लपाछपी खेळताना
स्वत्वात माझ्या लाव्हा भरतो...

काचेच्या पल्याडचा अवखळ पाऊस
अल्याडच्या मनाशी हितगुज करतो |
तुझ्या सोबतच्या प्रत्येक स्वप्नात
मम मनीचे नवरंग भरतो ...

हे पावसाचं नेहमीचं असतं
मला गालात खुदकन हसवणं |
मग माझा सहजंच होतं
थेंबानसवे तुला विसरणं.. .

२४/१४/२०११
प्राची (धुंद फुलपाखरू )..