ईश्वर

सुखात धुंद झालो तरी
तुला विसरलो असे नाही |
दुःखात रडलो म्हणून तुला
सारखे आठवतो असे नाही ...

तू माझ्या पाठीशी आहे
याचे मला भान आहे ...

तू मला तरशील वा मारशील
हा विचार नाही मला स्पर्शत |
प्रत्येक कर्म करताना तुला
नतमस्तक व्हावे एवढेच मला माहित ...

तू माझे बोट धरत नाहीस तर
मला चालायला शिकवतोस |
तुझी एकच विचारसरणी नसून  तू
मला स्वतंत्र जगायला शिकवतोस ...

तुझ्या पायाशी लीन होणे
म्हणजे काय ते नाही ठाऊक |
प्रत्येक कामाला, श्वासाला तुझे रूप
आठवावे ही माझी घाऊक समज ...

ईश्वर म्हणून मला तू कधी
वेगळा वाटला नाहीस |
माझ्या स्वत्वात तुझं अस्तित्व
याहून वेगळं रूप तू थाटल नाहीस ...

नोव्हेंबर २००६
प्राची (धुंद फुलपाखरू)...